مرحبا بكم في منتديات ابناء دنفيق 
من طرف احمد ايمن الثلاثاء 28 يونيو 2011, 9:48 pm
عزيز الشافعى..الفنان الزمالكاوى المعروف،إقترن إسمه بأغنية "وبحبك يا زمالك"..ثم إنطلق بعدها ليصبح من الفنانين القلائل بل دعونى أقول أول من يخرج شريط كاسيت كامل لفريق كرة لحبه ولعشقه لتراب هذا النادى..وياليت لاعبينا يشعرون بحب الآخرين لهذا الصرح بعيداً عن أى مكاسب..المهم..عرفته من فترة قصيرة على المستوى الشخصى..لكننى شعرت وكأنه صديق الطفولة..صدقونى ليس كلام مرسل..ولكن فعلاً أصبح حب الزمالك الذى جمع بين أفكارنا بحكم كتابتى..وبحكم أغانيه..كلها فى عشق الزمالك.
كنت أتكلم معه كثيراً تليفونياً بعد المباريات..وأخرها مباراة الجيش وقبل هزيمة المصرى..وهون على كثيراً بعدها..و لكنى قررت بعد الإحباط الشديد الذى قدمه الزمالك فى مباراة المصرى وإهداء الأهلى القمة على طبق من ذهب..أن أفعل أى شىء..لعل وعسى يرفع معنويات ملايين وعشاق الزمالكاوية قليلاً قبل لقاء القمة..فاليأس الذى تملكنا جميعاً..ربما يخرج منه نقطة أمل..فقابلته وأجريت معه هذا الحوار السريع الذى لن تقرأه سوى هنا على ZamalekFans.com
*عزيز..إزيك؟
انا الحمد لله تمام يا علاء.
*مش حطول عليك..بس خلينى أقول هل كنت تتخيل ولو للحظة واحدة أن يصل الزمالك لأن يكون فى هذا الوضع المحبط فعلاً؟
تنهد قليلاً.."لا ماكنتش متخيل نوصل لفرق النقط ده لكن خليني أكلمك بصراحة واقولك انه برضه ماكانش مستبعد ومش حاجة غريبة اوي انها تحصل عشان لازم نكون واقعيين ونقول ان في فرق كبير بين الأسامي اللي فى قائمة الاهلي وحتي الاسماعيلي وبين الأسامي اللي فى قايمتنا"
*يمكن إنت بحكم قربك من اللاعبين ومن الجهاز..تفتكر إيه اللى يخلى لعيبتنا تنهار بالشكل المريع اللى شوفناه ده؟
هوة مش انهيار ولا حاجة،اللعيبة عملت مجهود كبير فى الدور الاول وكملت لحد الاسبوع ٢٥، ولو المدير الفني اي حد غير حسام حسن كان الزمالك حيوصل بصعوبة للمركز الرابع او الخامس وده رأيي الشخصي رغم عدم رضايا عن مستوي الفريق فى الدور التاني كله
*بص..عايز أسألك سؤال صريح..تفتكر لو مانويل جوزيه كان مدرب الزمالك..كان عمل حاجة؟
متخيلش جوزيه يدرب الزمالك خالص ،لكن حتي لو حصل اعتقد انه ماكانش حيوصل لحاجة ،لكن المؤكد انه كان مش حيستحمل الظلم التحكيمي طول الدوري وكان حيتوقف الدور التاني كله عشان حيعترض عالتحكيم بطريقته المعروفة
*ماتش القمة محتاج إيه يا عزيز..وجاوبنى بصراحة..روح..ولا تكتيك..ولا هدوء من حسام حسن..يمكن أنا مكار شوية بالسؤال ده..بس حجاوبك بعد ما تجاوب ليه أنا قلت كده؟
ماتش القمة محتاج ثقة من اللاعيبة ،مساندة من الجمهور،توفيق من عند ربنا
*بصراحة..أنا إستنيتك تجاوب عشان نظريتى،إن هدوء حسام حسن اللى صعب تلاقيه..حيحافظ كتير على هدوء اللاعبين فى الملعب ومن هنا حسألك سؤال تانى..ليه لعيبة الزمالك مش قادرة تحس إنها فرقة كبيرة..على عكس لعيبة الأهلى؟
شعرت أن بداخله حزن ثم أجاب.."الجيل ده من اللاعبين بيتعرض وبيعرضنا معاه لأكبر أزمة ثقة فى تاريخ النادي واعتقد ان لولا مجهود حسام السنة اللي فاتت واستبسال اللاعبين فى الدور التاني والوايت نايتس كان زمان الزمالك لسة فاقد للتوازن،لكن جوة اللاعبين حاسين جدا بقيمة نادي الزمالك واسمه الكبير لكن ظروف كتيرة كلنا عارفينها بتقف قدام الزمالك ،وكل ما نيجي نقف علي رجلينا يطلعوا شلة المصالح والبيزنس تهد فى النادي
*عزيز..تيجى نحط خطة للقمة..تفتكر إيه التشكيل اللى ممكن تلعب بيه لو إنت مكان حسام..والتكتيك اللى ممكن تفاجىء بيه جوزيه؟
حلعب بليبرو هاني سعيد قدامه عمرو وفتح الله
وحلعب باحمد سمير باك رايت لو جاهز
وعبد الشافي باك ليفت
وف الوسط حسن مصطفي وعاشور وحسام عرفات وقدام شيكا وجعفر
وف الشوط التاني وعلي حسب النتيجة حدفع بحسين ياسر وعلاء علي وحازم امام
*ممكن أعترض على إسم عاشور..بس حلو فكرة الليبرو..طيب،أنا عندى خطة إسمح لى أن أشرحها لك سريعاً..إيه الى حيحصل لو أجلنا دور شيكا قليلاً..بمعنى تأجيل الدفع به..والدفع بهانى وحسن مصطفى وابراهيم صلاح من البداية لإحكام غلق منطقة الوسط..وده حيخلينا نربك الأهلى ونبعد شيكا قليلاً عن الشحن الجماهيرى..المشكلة،إن الدفع بشيكا دوماً لو لم يجدى.. بيعطل الزمالك تماماً..تخيل يا عزيز لو منعنا دخول أهداف فى مرمانا..ولم نحرز..ثم بدأت بالدفع بشيكا على حساب مصطفى مثلاً فى الدقيقة 40..سيتم إرباك الأهلى ونزول شيكا وهو يعلم أنه الورقة الرابحة..سترفع معنوياته كثيراً،هل أنت متفق على خطة مثل هذه..أم أنك ترى أن شيكا لابد أن يتم الدفع به حتى ولو بنصف قدم..وخسارته فنياً لو تم مراقبته مراقبة لصيقة؟
شعرت أنه يفكر فيما قلته..فأجابنى "ان شيكا يكون برة برضوا فكرة،وتبقي مفاجأة،بس صعب ان حسام يعمل كدة،لان شيكا ممكن يصنع الفارق فى اي لحظة
*طيب عزيز..جمهور الزمالك المحبط إحباط شديد..ممكن يقدم إيه تانى لفرقته؟
جمهور الزمالك هو اعظم وأحسن جمهور فى البلد دي،وصعب نقارن بيه جمهور تاني الا لو أتعرض لنفس الظروف طول تاريخه،وأقول للزملكاوية عامة،قدركم تشجعوا نادي عظيم اتكتب عليه تقف الظروف دائماً ضده،من اعلام فاسد ولجنة حكام مرتعشة واتحاد كورة انحيازه للبيزنس والمصالح وشركات الرعاية اللي فلوسها للمنافس بيبقي ليها دور كبير في صنع إنجازاته،لكن انتم صفوة وحتفضلوا دائماً بتساندوا ناديكم بقوة ونبل كالعادة مهما كانت الظروف
*إنت حضرت كام ماتش السنة ديه؟
حضرت كل الماتشات اللي ف القاهرة وسافرت السويس ف ماتش بتروجيت
*ياه..عدد كتير..طب إنت شايف إن بعد ده كله..جمهور الزمالك يستسلم ويقعد فى البيت..ولا اللى لسه متفائل شوية يشد اللى متردد ويروح على الاستاد؟
جمهور الزمالك مش مستنيني عشان اقوله روح،و انا وانت عارفين ان الزملكاوية حيساندوا الملكي حتي النهاية وبلا نهاية زي دخلة الوايت نايتس فى ماتش المصري
*أقولك ليه أنا قابلتك وعملت معاك الحوار..بص..عندى إحساس إن جمهور الزمالك ده بجد محتاج يفرح..ورغم كم الإحباط اللى فيه..قلت أتكلم مع شخص زيك فعلاُ ممكن بكلمة منه،الناس تروح وتشجع..نصيحتك إيه للزمالكاوية فى مباراة القمة؟
بقول لجمهور الزمالك لا تحزن مهما كانت النتيجة ،وخليك فخور انك زملكاوي ،بطولاتك اقل لكن كلها بعرق وكفاح مشرف
*توقعك للماتش إيه؟
اتوقع واتمني ان الزمالك يكسب ان شاء الله
*يارب..بالنسبة ليه..مش حقدر أتوقع..بس اللى أقدر أقولهولك..إنى من كم الإحباط..حاسس إن الزمالك محتاجنا نتفائل..حقولك السؤال بشكل أخر..فيه أسوء من إننا من فترة مش عارفين نغلب الأهلى..فتفتكر مش ده يخلينا فعلا نقول وإيه الجديد؟..مش حنخسر حاجة لو وقفنا كمان بكرة وعملنا اللى علينا..ياترى متفق معايا؟
كلامك صح واتفق معاك فيه،بقالنا فترة مش عارفين نكسب الاهلي.. بس يا تري ليه؟؟
عشان الأسباب اللي انا وانت وكل الزملكاوية حافضينها،بس لازم نعترف ان مستوي الاهلي اعلي من الزمالك دلوقتي ومش حيبقي غريب لو الاهلي كسب،وبروح الثورة ونبذ التعصب حنباركله،الدنيا مش حتقف،والزمالك حيفضل نادينا وحبيبنا مهما كانت النتيجة
*إيه السيناريو اللى ممكن ترسموا للدورى فى حالة الفوز إن شاء الله..تفتكر ممكن يتكرر سيناريو 2003؟
لو ربنا كرمنا وكسبنا الاهلي حنكسب الدوري ان شاء الله ومعنديش ادني شك ،وحنكسبه قبل اخر اسبوع كمان،بس قول يارب نكسب بس الاهلي
*طب لو لا قدر الله إتغلبنا؟!
و لو اتغلبنا أتمني برضوا،التجديد لحسام حسن لانه قادر لو الفريق استكمل المراكز اللي ناقصة فيه انه يحصد البطولات،ولازم يتجددله سنة عالاقل ومش لازم نبقي عاطفيين ونغير الجهاز لو لاقدر الله خسرنا الدوري عشان نهدي الجماهير،لازم ناخد بالنا من الظروف اللي حسام اشتغل فيها وحجم الإنجاز اللي حققه
*عزيز بجد أنا إنبسطت جداً إنى قابلتك..تحب تقول حاجة كمان للزمالكاوية من قلبك الزمالكاوى الأبيض أبو خطين حمر..قبل عزيز الشافعى الفنان؟
احب اشكرك فى النهاية يا علاء علي الحوار وعلي كتاباتك المميزة فى موقع زمالك فانز الرائع وعايز اقول لكل الزملكاوية نروح سوا الاستاد ونحتفل بنادينا في اخر مباراة قمة في سنة المئوية ونقول زي الوايت نايتس ما بتقول،
"الزمالك..كلمة بسبع حروف بتهز كياني وحاقولها تاني .. خدوا عمري كله واشوفه دايما فوق"
عزيز بشكرك..وأتمنى إن حوارنا ده يوصل للناس..يارب.
وبعد إنتهاء لقائى مع عزيز..لى تعليق أخير قبل الرحيل
*عجبنى رأى المشجع محمد جارحى على صفحة مقالاتى بالفيس بووك..قال كلمة جميلة أوى نصيحة لمشجعى الزمالك.."ماتروحش الإستاد عشان تشجع إلا وإنت مقتنع ان الزمالك حيفوز حتى لو الإستاد مابقاش فيه غير واحد زمالكاوى بس"
*صديقى العزيز أحمد عبد المجيد حتى الآن ينصحنى.."تفائلوا بالخير تجدوه".
*الاستاذ أحمد محسن على صفحة الفيس بووك أيضاً..قال لى"أرجوك لا تكون محبط أنت الآخر".
حقيقة..3 جمل جعلونى أقرر ألا أيأس وأجرى هذا الحوار مع عزيز..وإن شاء الله تعالى وبإذنه نجد خيراً..وإن لم يحدث..فقدر الله وماشاء فعل..وبالتوفيق غداً..إفخر بزمالكاويتك يا زمالكاوى وصدقنى.."من قمة هذا الإحباط..يمكن أن تولد ذرة أمل!"..يارب.
